Монгол Улсад орчин цагийн Төрийн тусгай хамгаалалтын байгууллага үүсэж хөгжсөний түүхт 85 жилийн ойг тохиолдуулан Их тэнгэр цогцолборт Төрийн тусгай хамгаалалтын туганд хүндэтгэл үзүүлэх ёслолын жагсаал зохион байгуулагдлаа.

Тэртээх 1938 оны 05 дугаар сарын 28-ны өдөр Дотоод явдлын яамны сайдын 129 дүгээр тушаалаар маршал Х.Чойбалсан болон нам, төрийн удирдагчдын амь насыг хамгаалах үүрэг бүхий тасгийг байгуулснаар тус байгууллагын орчин цагийн түүх эхэлсэн билээ.

Арга хэмжээг нээж бригадын генерал Л.Алтангэрэл хэлсэн үгэндээ: “Өнөөдөр бол Бид бүхний өргөсөн тангарагтаа үнэнч байж, төр, засгийн тэргүүн нарын аюулгүй байдлыг хангах эрхэм хүндтэй чиг үүргээ хэрэгжүүлж ирсэн түүхэн тэмдэглэлт өдөр юм. Анх байгуулагдаж байсан тэр цаг үетэй харьцуулахад өнөөдөр Төрийн тусгай хамгаалалтын байгууллага нь хүний нөөц болоод зэвсэглэл, техник хэрэгслээ орчин цагийн шаардлагад нийцүүлэн хөгжүүлэн бий болгосон төдийгүй Засгийн газрын тохируулагч агентлаг болон бие даан үйл ажиллагаагаа өргөжүүлсэн байна. Түүнчлэн уг өдрийг жил бүр тэмдэглэн өнгөрүүлэхдээ сүсэглэн дээдлэх ариун шүтээн, золбоо хийморийн бэлэгдэл болсон тугандаа хүндэтгэл үзүүлж байх тухай тушаал гаргалаа. Төрийн тусгай хамгаалалтын туг нь аливаа бахдам үйлс, бахархам түүх, амжилт, ололт, алдар гавьяа бүхний тэргүүн манлайд өндөрт мандан, намирч явах учиртай бөгөөд Та бид өөрсдийн хичээл зүтгэлээрээ тийнхүү мандуулж явах үүрэгтэй бас эрхтэй” гэдгийг онцоллоо.

ТӨРИЙН ТУСГАЙ ХАМГААЛАЛТЫН ГАЗАР